Яшьләребез “iВолга”га юлланды!

Идел буе федераль округының яшьләр форумы быел алтынчы тапкыр уза. Самара өлкәсендәге Мастрюков күлләренең фестиваль аланына Идел буе федераль округының барлык төбәкләреннән 2 меңгә якын яшьләр җыелды. Алар анда 4 августка кадәр булачак.
Форумда катнашучылар төрле сменаларга бүленеп, һәркайсы үз проектын тәкъдим итәчәк.
“Фән һәм мәгариф” сменасында яшь галимнәр, аспирантлар, укытучылар, “Мәктәп укучы­ларының Русия хәрәкәте” проекты координаторлары катнашуы көтелә.
“Син — эшкуар” сменасына килгән яшь инноваторлар, эшкуарлар үзләренең максатларын тормышка ашыра алачак.
“Мәдәни бум!”га, гадәттәгечә, мәдәният белән бәйле кешеләр киләчәк.
“Изгелек буыны” сменасында Җиңү һәм башка төрле юнәлеш­ләр буенча волонтерлар катнаша.
“Спортчы яшьләр — сәламәт милләт”. Форумга җыелган яшь­ләр арасында спортчылар, тренерлар, спортчы менеджерлар да бар. Алар спорт белән бәйле проектлар тәкъдим итәчәк.
“Сәясәт” мәйданчыгында сту-дент­ларның үзидарә әгъза­лары, яшьләрнең киңәшмә структуралары, сәяси партияләрнең яшь вәкилләре грант өчен көрә­шәчәк.
“Патриот” — патриотик оешма­ларның җитәкчеләре һәм әгъза­лары өчен каралган юнәлеш.
“МедиаВолна” сменасы форумны тулысынча яктыртып барачак яшь журналистларны туп­лый. Алар матбугат үзәге базасында осталык һәм гамәли дәрес­ләр, практик занятиеләр алачак.
“Хезмәт лигасы” быел беренче тапкыр оештырыла. Бу смена ике юнәлешкә бүленә: “Студент отрядлары” һәм “Эшче яшьләр”. Беренче юнәлештә студент отрядлары командирлары, комиссарлары, штаб методистлары һәм мастерлары катнашса, икенчесен­дә Идел буе федераль округының иң эре предприятиеләре вәкил­ләре булачак.
Шулай ук, форумда Кытай һәм башка илләрдән яшьләр катнашачак.
Ун көн дәвамында яшьләр белән профессиональ экспертлар, бизнес-тренерлар, галимнәр һәм, шулай ук, билгеле шәхесләр эшләячәк. Форумда катнашучыларга үзләренең проектларын тәкъ­дим итеп, грант өчен көрә-шергә мөмкинлек бар. Биш ел эчендә 158 проект грант алган һәм төрле шәһәрләрдә, авылларда тормышка ашырылган.