"Бөдрә чәчле егет" торты

2 стакан каймакны, 2 стакан шикәрне, уксуста сүндерелгән 1,5 чәй калагы соданы һәм 2 стакан онны яхшылап болгатам һәм алдан кыздырырга куелган духовкага 20-25 минутка пешерергә куям. Ул пешкәнче крем эшли торам. 600 грамм куе кибет каймагына 1 стакан шикәр комы яисә шикәр пудрасы, ярты лимон суты салам да яхшылап болгатам.

Бисквитны пешеп җитү белән кисмим, суынганын көтәм. Шуннан ике бармак башы кадәр шакмакларга кисәм һәм лимонлы-каймаклы кремда коендырам. Өстенә глазурь ягам. Аны болай эшлим: 4 аш кашыгы каймак, 3 аш кашыгы какао, 4 аш кашыгы акмайны, 4 аш кашыгы шикәр комын талгын утта эретәм, әмма кайнатып чыгармыйм! Шуны тау сыман өелгән тортның өстенә агызам.

Бу торт бигрәк тә икенче көнне телне йотарлык була.

Хуҗабикәләр, иренмәгез, пешереп карагыз, үкенмәссез!