Матурлык тудыруда катнаш!

Мөһим проект халыкның катнашуын да күздә тота. Әйтик, быел 23 төбәкнең унөчендә бүленгән сумманың 5 проценты күләмендәге акча халыктан җыелган. Калганнарында кешеләр төзеклән­дерүдә эш көче буларак катнашкан.
— Тәүдә 354 ихатаны һәм 34 җәмәгать территориясен төзеклән­дерү планлаштырылган иде, ләкин акчаны экономияләү нәтиҗәсендә урыннарда эшләр күбрәк башкарылды. Быел “Уңайлы шәһәр мохитен булдыру” федераль программасы кысаларында 416 ихата һәм 37 җәмәгать территориясе төзеклән­дерелде, — диде журналистлар белән очрашуда респуб­ликаның торак-коммуналь хуҗалык министры урынбасары Альфред Зиннәтуллин. — Без республика халкының бөтен теләкләрен һәм тәкъдимнәрен исәпкә алырга тырыштык. Бүгенге көнгә эшләр төгәлләнде.
— Халык бу программаның никадәр әһәмиятле икәнен һәм үзләре катнашлыгында тирә-якны яхшы якка үзгәртеп булуын белергә тиеш. Әлеге эшкә акчасын һәм хезмәтен салу, аларның үзаңын да үзгәртер һәм кеше­ләр ихаталарына бөтен­ләй башкача карашта булыр, дигән ышанычтабыз, — дип белдерде Башкортстан Иҗтимагый палатасы рәисе Ольга Панчихина.
Уфаның Торак-коммуналь өлкә­сендә җәмәгать контроле үзәге вәкилләре дә шундый фикердә.
— Шушы проектны гамәлгә ашыру нәтиҗәсендә йорт комитетлары рәисләре аралаша башлады. Элек бер-берсен белмиләр дә иде, — диде Үзәк хезмәткәре Надежда Гайнетдинова.
Халыкның активлыгын Гомумрусия халык фронтының Башкортстан төбәк башкарма комитеты җитәкчесе Виталий Брыкин да билгели.
— Без урыннарга чыгып, проектны гамәлгә ашыруны тикшерәбез, халыкның зар­ларын һәм тәкъ­димнәрен өйрәнәбез. Республи­каның бөтен районнарын да тулысынча колачлау өчен кайбер муниципалитетларда конкурста катнашуга заявкалар алу озайтылды, — диде ул.
Чыннан да, бетон бутап, ихаталарны төзекләндерү авыр түгел. Иң авыры — халыкка проектның кем тарафыннан, ни өчен эшләнгәне турында мәгълүмат җиткерү.
— Кешеләрдә бу безнең ихата, безнең сквер һәм балалар мәй­данчыгы дигән тойгы уянырга тиеш. Шунысы шатландыра, алар бу проектка ышана һәм теләп катнаша, — диде Альфред Зиннәтуллин.